بۆ( ژیل دۆلۆز)

شیعر و وشه‌

ن: هاشم سەڕاج

ئه‌م شه‌و له‌ مه‌یخانه‌یه‌كى وه‌نه‌وشه‌یى

به‌مه‌ستى

(ڕه‌نگدانه‌وه‌كان ) و زاراوه‌گه‌لێكم به‌لاوه‌ناو

هۆشم ورووژاو

له‌چییه‌تى زاراوه‌گه‌لێكى (دۆلۆز)ى ڕامام و

به‌زرنگه‌ى بوون به‌ و لۆچ و كرانه‌وه‌و هه‌ڵهاتن و

هێڵ و ڕووته‌خت و خاڵ

نه‌شوه‌یه‌كى نه‌رم وناوازه‌ دایده‌گرتم و

یارى به‌ته‌زووى ئاره‌زووه‌كانم ده‌كرد

چه‌شنى به‌دمه‌ستێكى بێباك

نه‌ئاوڕم له‌ بڵندگه‌رایى

دایه‌وه‌ نه‌ قووڵگه‌رایى

به‌ڵام خوڵقاندنى چه‌مكى ئیستاتیكى

له‌هزرم جیانه‌ده‌بۆوه‌

تومه‌ز زه‌ینى په‌رشوبڵاوم خزابۆوه‌

نێو دۆخى (ئیمانێنت) ه‌وه‌

له‌خۆدابوون و له‌سه‌رزه‌ویبوون

یه‌كسه‌ر (جیهانى ژیان)ى ( هوسرڵ) و

(نیشته‌جێبوون له‌ نێو جیهاندا) ى

(هایدیگه‌ر) یان بیرده‌خستمه‌وه‌

من به‌جۆشوخرۆشه‌وه‌ ئالووده‌ى شیعرو جوانیم

له‌به‌رخۆمه‌وه‌ وتم

دۆلۆز جیاوازى له‌خودى شته‌كاندایه‌ و

له‌ناویه‌ك و له‌یه‌كلۆچدان

شیعریش بوونه‌وه‌رێكى نیگه‌رانى زمانى و ئیستاتیكییه‌

هه‌م هه‌ڵگرى توخمه‌كانى ئه‌قڵانى و هه‌م نائه‌قڵانى

جوانیش هێزێكى له‌ززه‌تبه‌خشه‌ وبه‌ناویدا گوزه‌رده‌كاو

جه‌سته‌ى له‌ گوژمه‌كان ده‌خشێنێ و جوغزى سوبێكى زمان

تێكده‌شكێنێ و له‌زیندانى فۆرم ده‌چێته‌ده‌ره‌وه‌

شیعر هه‌ڵوه‌داى بڵێسه‌ى جوانی و ماشێنى ئاره‌زوو و

هێزى حه‌زكردنه‌ و له‌هه‌موو شوێنێكه‌وه‌ هه‌ڵده‌قووڵێ و

قوڵپده‌داو ده‌ڕژێ و فیچقه‌ده‌كاو ده‌پرژێت و خوڕه‌ى دێت

نه‌ست كارخانه‌ شینه‌كه‌یه‌تى كێ له‌م لێڵى و جه‌نجاڵییه‌

له‌سیماى شیعر و شێتى و زمان ده‌گا كه‌ سه‌رشارن به‌

هه‌ست و جووڵه‌ى بێشوومارى ئاره‌زوو

شیعر وزه‌ وه‌رده‌گرێت و ده‌یبه‌خشێته‌وه‌ و تێپه‌رگه‌ى

ته‌زووه‌كانى هزرو وشه‌یه‌ و ئاره‌زوو تیایدا

هێزو گوژمێكى نادیاره‌وتێركردنى مه‌حاڵ و نه‌كرده‌

خاوه‌ن وزه‌یه‌كى جیاوازى شیزۆییه‌ و دیوارى (سۆسیۆكان)

ده‌سمێ و بازده‌داو خۆى له‌ودیوى ده‌سه‌ڵاته‌كان ده‌دۆزێته‌وه‌و

ڕووى له‌ (مۆلاره‌كان) وه‌رده‌گێڕێ و

باوه‌ش به‌ په‌راوێزخراوه‌كانا ده‌كا و

حه‌زى به‌ جیابوونه‌وه‌و جیاوازیی و ڕیسك و جه‌سته‌ى بێئه‌ندامه‌

دژى ئۆرگانیزه‌كردن و ڕه‌قێتى و نه‌گۆڕیى و كۆنترۆڵ و كۆدسازى و سیستماتیزه‌كردن و كاراكته‌رى پارانۆیدى

خۆى له‌ نه‌رمڕه‌وى و جووڵه‌ و شلێتى و بڵاو بوونه‌وه‌ى ڕیزۆمیدا

ده‌دۆزێته‌وه‌ !