دوو هۆنراوە
ن: رێبوار دەلاک
(١)
بەمنداڵی پێت ئەوتم
چمکی عەباکەم توند بگرە
نەبا ونبی کزەی جەرگم
لەگەڵ هەنگاوما ڕێ ببڕە
کەگەورە بووم وتت کوڕم
دەستی بێهێزم توند بگرە
لەگەڵ هەنگاوتا ڕێ ناکرێ
گۆچانی ئەوێ ئەم عومرە
کەنەخوشبووم ئەتوت خوایە
دوعاکانم لێ وەرگرە
بەرگەی گریانی ناگرم
گریانەکەی جەرگ بڕە
بەڵام ئێستا تۆ نەخۆشی
چاوم لەفرمێسکا پڕە
هەست بەبوونی خۆشم ناکەم
لاشەم هێندە ساردو سڕە
ئەی خوایە گیان دایک لای تۆ
زۆر پیرۆزە ئێش ڕاگرە
من لەجێگەی ئەو دابنێ
ئازار لەسەر ئەو هەڵگرە
(٢)
هەستەکەم ئەوەی خۆشمەوێ
وەکو سوپای داگیرکەرە
لەسنوری گشت ژیانم
فەرمانڕەوای سەرتاسەرە
لەگەڵ دۆست و هاوڕێی تەمەن
بمبینێ ئەو ئاگر دەگرێ
ئەمخاتە بەردەم سزایەک
تا ڕێ لە هەنگاوم بگرێ
ئەو جوانی شازادەی عەشقە
منیش ئەڵقەم لە پەنجەیام
ئەگەر گەڵای وەرویش بم
لەسایەی بەژن و باڵایام
حاشا ئەگەر بیر لەتۆڵەی
داگیرکاری بکەمەوە
خوا بمکوژێ ئەگەر ئاوڕ
لە ئازادی بدەمەوە
دڵم وەک یەک بەسەر چوارلای
دڵی خۆتا بەش بەشیکە
سەربەخۆیم ناوێتەوە
نەخشەی تازەممان دیاریکە
گیانەکەم بۆ زوو نەهاتی
هەموو ژیانم داگیرکەی
ئاڵای سپیم هەڵکردبوو
تاخۆت دیلی ئەبەدیمکەی
فۆتۆ: چنوور محەممەد
ژیاننامەی نووسەر
ناوم ڕێبوار محەمەد میرزا کریم
ناسراوم بە ڕێبواری دەلاک
لەساڵی 1970 لەدایک بووم
خوێنەرێکی باش بووم هەرلەسەرەتای ژیانمەوە هەر ئەمە بووە هۆی نوسینم لەساڵی2010 نامیلکەیەکی شیعریم چاپ کردووە بەناوی (یەکەم دیدار) لە ساڵی ( 2019) چاپی دووەمم بەناوی (وەرزی ئەوین) ەوەیە.
ئێستا 200 لاپەڕەی شیعریم ئامادەیە بۆ چاپکردن
شیعرم هەڵبژارد بەشێکە لەعەشق و خۆشەویستی بۆ من شیعرو پیشەی سەرتاشین ،وەکو مناڵەکانم وان کەسیان لەیەکتر جیا ناکەمەوە کەسیا لەوی تر کەمتر نین شیعرو سەرتاشین هەر دووکی هونەرن بەڵام جیاوازن بە خۆشەویستی لەدڵەوە هەڵمبژاردوون ،پەیوەندی ڕۆحیم لەگەڵ هەردوکیاندا هەیە ’ هەرشتیک بە قوڵی خۆشت نەوێ ناتوانێ تێکەڵ بەیەکتر بن،یەك یەكتری هەڵدەبژێرێ لەگەڵ ڕێزو سوپاس بۆ ئێوەی قەدر گران و خۆشەویست
