ڕێکخراوێکی ئەمریکی، کار بۆ نۆژەنکردنەوەی زیاتری سەرای سلێمانی دەکات
*بەڕێوەبەری گشتی: دەبێت رێكخرا و و حكومەتە جیاجیاكان، زیاتر كار و پرۆژە و خزمەتەكیان لەبواری رۆشنبیریی بێنن بۆ سلێمانی
لە چوارچێوەی ئەركەكانیدا، رێكخراوێكی ئەمریكی تایبەت بە بواری شوێنەوار و هونەر و كەلتور كە لقیان هەیە لە هەرێمی كوردستان، بڕیارە چەند كارێكی نۆژەنكردنەوە و ئاوەدانكردنەوە لە سەرای سلێمانی ئەنجامبدات.
ئەمڕۆ 12/2/2023، د. موحسین ئەدیب بەڕێوەبەری گشتیی رۆشنبیریی و هونەری سلێمانی، بەئامادەبوونی نوێنەرانی میرایەتی بنەماڵەی بابان، پێشوازیكرد لە خاتوو لانە حەداد بەرپرسی ئۆفیسی هەرێمی كوردستانی رێكخراوی TARII ی ئەمریكی تایبەت بە پێشكەشكردنی خزمەت بە بواری شوێنەوار و هونەر و كەلتور.
لە دیدارەكەدا، سەرەتا لانە حەداد مەبەستی سەردانەكەیانی بۆ سلێمانی روونكردەوە، كە دەیانەوێت چەند كارێك و خزمەتێك لە بواری شوێنەوار پێشكەش بە پارێزگای سلێمانی بكەن لە ناو شار و لەقەزا و ناحییەكان، وەكو قۆناغی یەكەمی كاركردنیان دەیانەوێت هەندێك كار بۆ سەرای سلێمانی بكەن، كە رەمزی بەرخوودان و خۆڕاگریی سلێمانییە.
لە بەرامبەردا، بەڕێوەبەری گشتیی، خۆشحاڵبوو بەو ئەركەی رێكخراوە ئەمریكییەكە بڕیاری لێداوە، بۆ ئەمەش بایەخی زیاتری شاری سلێمانی بۆ روونكردنەوە و رایگەیاند: سلێمانی، بە بڕیار و بە یاسا كراوە بە پایتەختی رۆشنبیریی هەرێمی كوردستان، بۆیە دەبێت رێكخرا و و حكومەتە جیاجیاكان، زیاتر كار و پرۆژە و خزمەتەكیان لە بواری رۆشنبیریی و هونەریی و شوێنەوار و كەلتور و فەرهەنگ بێنن بۆ سلێمانی، بەتایبەت كە هەڵكەوتەی سلێمانی وایە كە شاری رۆشنبیران و هونەرمەندان و شارێكی زیندووە. لەبارەی ئەو پرۆژەیەی رێكخراوەكەش هەیەتی بۆ سەرای سلێمانی و بۆ هەموو قەزا و ناحییەكانی سنووری پارێزگای سلێمانی، بەڕێوەبەری گشتیی ئامادەیی هەموو جۆرە هاوكاریی و كارئاسانییەكی بۆ رێكخراوەكە دەربڕی.
پاشان، نوێنەرانی میرایەتی بنەماڵەی بابان، چەند روونكردنەوەیەكیان پێشكەش بە بەرپرسی رێكخراوەكە كرد، لەبارەی مێژوو و بایەخ و كەلتوری شاری سلێمانی.
دواتر بە شێوەیەكی مەیدانی بە یاوەری بەڕێوەبەری گشتیی و نوێنەرانی میرایەتی بنەماڵەی بابان، بەرپرسی رێكخراوی TARII سەردانی سەرای سلێمانی كرد و لە نزیكەوە سەرای بەسەركردەوە.
