لەهەورامانی تەخت رێوڕەسمی جەژنی پیرشالیار بەرێوە چوو
رێوڕەسمی پیر شالیار هەموو ساڵێك دوو جار و لە دوو کاتی جیاوازدا بەڕێوە دەچێت كە یەكەمیان لە 12ی مانگی رێبەندان (ڕۆژانی 1 و 2 و 3ی مانگی 2ی زایینی) لەژێر ناوی “زەماوەندی پیر” دایە و ڕێوڕەسمی دووەمیشیان لەژێر ناوی “كۆمسای” لە مانگی بانەمەڕی ساڵی هەتاوی (5 -5ی ساڵی زایینی) بەڕێوە دەچێت.
لە ماوەی ئەو سێ‌رۆژەدا كە ئەو رێوڕسمە بەڕێوە دەچێت، داب و نەریتە كانی تایبەت بە ڕێوڕەسمە لەوانە “كڵاو ڕۆچنە، قوربانیكردنی مەڕ و بزن، لێنانی چێشتی تشین، دەفژەنی و سەمای عیرفانی، زیکر و تەوافكردنی كەوشی چەرمیی پیر شالیار” لەناو بەشداربواندا بەڕێوە دەچێت.
بەپێی سەرچاوە مێژووییەكان پیرشالیار، پیرێكی رۆحانی و خواناس و یەكێك لە موغ (مۆبد)دانی سەردەمی زەردەشتی پێغەمبەر بووە و لەلای خەڵكی هەورامان ڕێزێكی زۆری هەیە و كتێبەكەی (ماریفەتوو پیری) پیشانی كەسانی بێگانە نادەن و گوتەكانی لەباتی مەتەڵ بەكار دەهێنرێن و خاوەنی كەراماتی زۆر بووە .
مێژووی ئەم جەژنە، بەپێی زۆربەی هەرە زۆری سەرچاوەکان دەگەڕێتەوە بۆ سەردەمی پێش بەئیسلامبوونی کورد، واتە دەمێ کە کوردستانییان پیڕەوکاری ئایینی زەردەشتی بوون، لەبەرئەوەی خودی (پیر شالیار) کە رێورەسمەکە بەناوی زەماوەندی ئەو زاتەوە ناودێر کراوە، موغێکی پلەباڵا و زاناو و دانا و خودان پێگەیەکی ئایینی و کۆمەڵایەتیی بەرز بووە و لای خەڵکی ناوچەکە (هەورامانی تەخت) لە کوردستانی رۆژهەڵات، جێگەی رێز و تەقدیرێکی زۆر تایبەت بووە. فۆتۆگراف و ئامادەکار : چنوور محەمەد
