بەرهەمێکی نوێی بەختیار عەلی بەمزوانە بڵاو دەبێتەوە

بە پێی هەواڵێک کە ناوەندی رەهەند بۆ چاپ و بڵاوکردنەوەی کتێب لە شاری سلێمانی بڵاوی کردۆتەوە:

وەک دەریایەک پڕ لە نهێنی، نوێترین بەرگی پڕۆژەی کۆکردنەوەی بەرهەمە تیۆرییەکانی نووسەر و ڕۆمانووس بەختیار عەلی-یە، کە بەرگی 15یە و لە دوتوێی 304 لاپەڕەدا لە ئایندەیەکی نزیکدا لە لایەن ناوەندی رۆشنبیریی ڕەهەندەوە چاپ و بڵاو دەکرێتەوە. سەبارەت بە ناوەرۆکی ئەم کتێبە نووسەر دەڵێت:

ئەم کتێبە ژمارەیەک چاوپێکەوتنی ئەدەبییە، سەفەرێکی تا ئەندازەیەک وردە بە نێو کارە ئەدەبییەکانی نوسەردا. لەم کتێبەدا، کارە ئەدەبییەکانی وەک «دەریاس و لاشەکان» «شاری مۆسیقارە سپییەکان» «بۆ دۆزەخ، ئەی بێگوناهان» و چەندانی تر بوونەتە بابەتی گفتوگۆ. ڕەنگە بڵێم کەم پرسیار هەیە لە خەیاڵی خوێنەری جددیدا بێت و لەم دیدارانەدا لە نوسەر نەکرابن. ئەم کتێبە بەرگی 15 ی کۆکراوەی بەرهەمە تیورییەکانی نوسەرە. بەر لەم کتێبە، بەرگی سێی ئەم کۆکراوانە «وەک باڵندەی ناو جەنگەڵە ترسناکەکان» تایبەت بوو بە هەندێک چاوپێکەوتن، دوای ئەو بڕیاربوو بە زوویی لەم زنجیرەیەدا هەندێ بەرگی دی بۆ کۆکردنەوەی چاوپێکەوتنەکان تەرخانبکرێت، بەڵام تا گەیشتن بەم بەرگە دەرفەتێکی دی وا نەڕەخسا. ئەم چاوپێکەوتنانە دەروازەیەکی کراوە و فراوانن بۆ تێگەیشتن لە دونیابینی نوسەر، بۆ تێگەیشتن لە ڕۆمان و شیعر و کارە تیورییەکان. لەم جۆرە کتێبانەدا خوێنەر بەر نیازی ڕاستەقینەی نوسەر دەکەوێت، تێدەگات نوسەر چۆن دەنوسێت و بۆ دەنوسێت، بۆ لەو ڕێگایەدا هەندانێک دەبنە دۆست و هەندانێک دەبنە دوژمن « من کەسێکم بەرهەمگەلێکی زۆرم هەیە کە ڕووبەرێکی فراوانی داگیرکردوە، پێم ئاساییە ئەو کارانە خەڵکێک توڕەبکات، لێی بترسن، بچنە سەنگەرەوە لێی… ئەوە خۆی بەشێکی گرنگی نیازی نوسینە کە نەیارەکانی تووشی تەنگژەی قووڵ بکات، من نانوسم تەنیا بۆئەوەی ستایش بکرێم، دەشنوسم بۆئەوەی توڕەبکەم، دوودڵی دروستبکەم، ڕەدبکەمەوە، شۆک بخولقێنم”.

بۆ ئاگاداریی خوێنەران بەرگەگانی پێشتری ئەم پرۆژەیە ئەمانەن:

1. چێژی مەرگدۆستی »٢٠١١»

2. لەدیارەوە بۆ نادیار »٢٠١١

3. وەک باڵندەی ناو جەنگەڵە ترسناکەکان »٢٠١٢»

4. ئیمان و جەنگاوەرانی » ٢٠٠٤»

5. ئاوڕەکەی ئۆرفیۆس »٢٠١٤»

6. نەرسیسی کوژراو »٢٠١٥»

7. یادەوەری و زەمەن »٢٠١٥»

8. ناشوێن »٢٠١٩»

9. ئۆپۆزسیۆن و پۆرترێتەكانی »٢٠١٩»

.10دوا خەندەی دیكتاتۆر »٢٠٢٠»

.11خوێنەری کوشندە »2021»