بەهرام عەزیمی دەرهێنەری ئەنیمەیشن و سیناریۆنووس و دیزاینەری” کارەکتەریی و کاریکاتێریست”
دەرهێنەری ئەنیمەیشن و سیناریۆنووس و دیزاینەری “کارەکتەریی و کاریکاتێریست”
ن: بەختیار سەعید
بەهرام عەزیمی یەكێكە لەو كاریكاتێرستە ناوبانگانەی ئێران و زۆرجار بە هونەرمەندی خەڵاتەكان ناوی دێت، ئەو بەتەنها كاریكاتێرست نییە، بەڵكو سیناریۆنووس و داوەرو نیگاركێش و دەرهێنەری سینەماییە، ئەو لەهەموو ئەم بوارانە توانیوێتی نەك بەتەنها لەسەر ئاستی ئێران، بەڵكو لەسەر ئاستی جیهان 97 خەڵاتی هونەری بباتەوە كە زۆربەی لەنێوەندە هونەرییە جیهانییەكاندا بەدەستیهێناوە.
بەهرام لەو بڕوایەدایە كە هونەری كاریكاتێر بە ئاسانی لە جیهاندا بەردەستە و دەتوانێت لەم بارودۆخانەدا زۆر کاریگەر بێت و چەندین بەرهەم دروست دەبن. لە کاتێکدا هونەرەکانی وەک سینەما و شانۆ و مۆسیقا و شیعر نەیانتوانی بە خێرایی بەرهەمەکان بە بابەتی کۆرۆنا دابین بکەن. بەهۆیەوە کارتۆنەکان لە نێوان هونەرەکانی تردا ڕۆڵی زیاتر دەگێڕن.
بەهرام بۆتە رووكاریكی جیهانی بۆ ئێران، رووكارێك دەكرێت لە قوڵایی دڵیانەوە شانازی پێوە بكەن، چونكە هونەرمەندێكی كەم وێنەو پڕ چالاكی و پڕ ئەزموونی هەموو ئەو بوارنەیە كە ئەم كاری تێدا دەكات، بردنەوەی ئەو ژمارە زۆرەی خەڵاتەكان گەواهی گەورەیی و مەزنی ئەم هونەرەیە كە چۆن توانیوێتی لەرێگای هونەرەوە دنیای تایبەت درووست بكات.
بایۆگرافی بەهرام عەزیمی
– 1967 لە تاران لەدایكبووە.
– دەرچووی زانکۆی هونەری تاران بە بڕوانامەی کاری دەستی، هەڵگری بڕوانامەی هونەرییە بە پلەی دووەم لە وەزارەتی رۆشنبیری و ئیرشادی ئیسلامی.
– 1997 ەوە مامۆستای ماڵی کارتۆنی ئێران و مامۆستای زانکۆکانی هونەریی تاران بووە.
– بەڕێوەبەری ماڵی ئەنیمەیشنی شارەوانی تاران بۆ ماوەی سێ ساڵ.
– براوەی 97 خەڵاتی نیشتمانی و نێودەوڵەتی لە بوارەکانی کاریکاتێر و ئەنیمەیشن و نیگارکێشان لە ساڵی ١٩٨٦ەوە.
– ئەندامی لیژنەی دادوەریی زیاتر لە ١٠٠ فێستیڤاڵی نیشتمانی و نێودەوڵەتی ئەنیمەیشن و فیلم و کارتۆنی كردووە.
– سیناریۆنووسی فیلمی “ال” و “تاران ١٥٠٠“.
– دەرهێنەری فیلمی “تاران ١٥٠٠” و دەرهێنەری کورتە فیلمی ئەنیمەیشن و ئەنیمەیشنی پەروەردەیی و ریکلامی لە ساڵی ١٩٩٣ەوە.
گرنگترین خەڵاتەکان:
– 1993 خەڵاتی دووەم لە فێستیڤاڵی کارتۆنی ئەنکۆنا لە ئیتاڵیا.
– 1995 خەڵاتی دووەمی فێستیڤاڵی “ئاسمانی شینی تاران”ی ئێران.
– 1996 خەڵاتی یەکەم لە فێستیڤاڵی کارتۆنی پراسیکابای لە بەرازیل.
– 1999 خەڵاتی دووەم لە فێستیڤاڵی کارتۆنی ئۆلێنس لە بەلجیکا.
– 2000 خەڵاتی دووەمی فێستیڤاڵی کارتۆنی “کۆمیک”ی ئیتاڵی.
– 2000 خەڵاتی یەکەمی فێستیڤاڵی کارتۆنی “غاز”، ئێران.
– 2001 خەڵاتی تایبەتی فێستیڤاڵی کارتۆنی سۆرگۆمی ڕووسیا.
– 2002 خەڵاتی یەکەمی فێستیڤاڵی کارتۆنی “ئاشتی”ی ئێران.
– 2003 خەڵاتی سێیەمی فێستیڤاڵی کارتۆنی “هەڵبژاردنەکان”، ئۆکرانیا.
– 2004 خەڵاتی تایبەتی فێستیڤاڵی کارتۆنی چین.
– 2006 خەڵاتی تایبەتی فێستیڤاڵی کارتۆنی “دژە جەنگ”، سربیا.
– 2006 خەڵاتی تایبەتی (کلیلی زێڕین)ی نوخبەکانی تاران، ئێران.
– 2007 خەڵاتی تایبەتی قۆناغی یەکەمی فێستیڤاڵی فیلمی “شار”ی ئێران.
– 2010 پێشبڕکێی گەورەی فێستیڤاڵی دۆن کیشۆت ئەڵمانیا-ئازەربایجان.
– 2011 خەڵاتی تایبەتی فێستیڤاڵی ئەنیمەیشنی مەکسیکی “Cut Out” .
– 2013 خەڵاتی یەکەم لە فێستیڤاڵی نێودەوڵەتی فیلمی ئەنیمەیشنی کازان لە ڕووسیا.
– 2016 خەڵاتی یەکەم بۆ باشترین دەرهێنەری “دووهەمین فێستیڤاڵی فیلمی سامە”ی ئێران .
– براوەی خەڵات و دەستخۆشی دیکەی وڵاتانی ئێران، تورکیا، ئەرجەنتین، یوگسلاڤیا، هیندستان، چین، ئیمارات، قوبرس، تایوان، کۆڵۆمبیا و ئازەربایجان.
