کۆنسێرتێک بۆ پشتگیریی و ھاوکاریی لێقەوماوانی باکوور و ڕۆژئاوای کوردستان بەرێوەچوو

فێرگەی میوزیک و گۆرانی نامدار قەرەداخی کە بەهاوکاریی بەرێوەبەرایەتی ڕۆشنبیریی و هونەری سلێمانی ماوەیەکە لە خۆئامادەکردندایە بۆ سازدانی کۆنسێرتێک بۆ تەمەنە جیاوازەکان ئەمڕۆ هەینی کاتژمێری 4ی پاشنیوەڕۆ 10/2/2023 بەئامادەبوونی هەریەک دکتۆر هەڤاڵ ئەبوبەکر پارێزگاری سلێمانی و دکتۆر موحیسن ئەدیب بەرێوەبەری گشتی ڕۆشنبیری و هونەری سلێمانی و بەرپرسانی حزبی و حکومی و ژمارەیەکی زۆر لە هونەردۆستان کۆنسێرتەکە لە تەلاری هونەر بەرێوەچوو .

کۆنسێرتەکە کە لەکۆرسی منداڵانی باخچەی ساوایان، کۆرسی فێرگەی نامدار قەرەداغی و چەندین هونەرمەندی گۆرانیبێژی پێکهاتبوو بە دەقەیەک وەستان بۆ ڕۆحی قوربانیانی بوومەلەرزەکەی باکوور و ڕۆژئاوای کوردستان دەستیپێکرد پاشان دکتۆر موحسن ئەدیب وتاری بەرێوەبەرایەتی گشتی ڕۆشنبیری و هونەری سلێمانی پێشکەش بە ئامادەبووان کرد و وێڕای ڕوونکردنەوەی بڕیاری وەزارەتی ڕۆشنبیری و لاوان لە بارەی ڕاگرتنی چالاکییە ئاهەنگ ئامێزەکان وتی: گەلی سەرکەوتوو ئەو گەلەیە کە بتوانێت کارەساتەکان بگوازێتەوە بۆ بڕوا بەخۆبوون و سەرکەوتن، بۆ ئەم مەبەستەش دەبێ لە کاتی تەنگانەدا چەندە هەژار و لێقەوماوەکان پێویستیان بە هاوکاری و هاوسۆزی هەیە زۆر زیاتریش بەخشەندەکان دەستکراوە و سەخاوەتمەند بن لە کۆمەک کردن و هاوکاریکردنی خەڵکی هەژار و لێقەوماو، بۆیە ئەم کۆنسێرتە دەرفەتێکە بۆ یارمەتیدانی خوشک و براکانمان لەو ناوچانەی کە بوومەلەرزە زیانی پێگەیاندوون.

دواجار هونەرمەندانی بەشدار کۆمەڵێک سرود و گۆرانی ڕەسەنی کوردییان پێشکەش بە ئامادەبووان کرد کە بە گەرمی پێشوازییان لێکرا لە کۆتاییدا فێرگەی نامدار قەرەداغی رێز و سوپاسنامەیان ئاراستەی چەند هونەرمەندێکی دیاری شاری سلێمانی کرد .

فۆتۆ: عەدنان رۆژبەیانی