سه‌رتاپای زه‌وی لانه‌ و ماڵمانه‌

محه‌مه‌د كوردۆ

گیانه‌ من و تۆ جووتێ‌ كۆترین

عیشق باڵمانه‌

گشت ئاسمانه‌كان

شوێنی فڕین و

سه‌رتاپای زه‌وی لانه‌ و ماڵمانه‌

كه‌ ده‌نوك ده‌سووین

له‌ ده‌نوكی یه‌ك

هه‌رچی عاشقی ئه‌م جیهانه‌یه‌

گوێیان له‌ گمه‌ و ناڵه‌ناڵمانه‌

زۆر جار ڕوو ده‌دات

هێشتا خۆر تازه‌

كاكۆڵی زه‌ردی به‌رداوه‌ته‌وه‌

ئێمه‌ بۆ نمه‌ی دڵۆپێك شه‌ونم

یاڵه‌ و یاڵمانه‌

ئێمه‌ ئاسووده‌ین

چه‌ند بۆ دوور بفڕین

هه‌ستی غه‌ریبی ناگاته‌ دڵمان

چونكه‌ دڵنیاین خوا له‌ پاڵمانه‌

هه‌ستی غه‌ریبی ناگاته‌ دڵمان

چونكه‌ دڵنیاین

گشت ئاسمانه‌كان

شوێنی فڕین و

سه‌رتاپای زه‌وی لانه‌ و ماڵمانه‌